Ons liefdesverhaal het begin die dag toe Stefan besig was om in te trek by die koshuis vir nog ’n universiteitsjaar. Terwyl tasse rondgesleep en eerstejaars rondbeveel is, sien hy skielik vir Phebe. Hy was so stomgeslaan dat hy nie eers haar broer (sy vriend) langs haar gesien het nie. Liefde op die eerste oogopslag! Na vele suksesvolle pogings om naby haar te kom en haar beter te leer ken, het hy die moed bymekaar geskraap vir die groot gesprek... Om vir David te vra of hy sy suster op ’n date kan vat. Ons eerste date was by Mustang Sally’s en dit het gelukkig baie goed verloop, al het Stefan soos ’n ontsnapte tronkvoël gelyk. Sy hare was kort geskeur, met ’n ster agter op sy kop uitgesny as deel van die koshuis se ontgroening. Gelukkig weet ons Phebe het nie net vir sy looks gegaan nie! Vier jaar later staan ons hier, vol liefde, lag en ongelooflike herinneringe, en ons kan nie wag om die volgende hoofstuk aan te pak en ons lewe saam te begin nie!